أمور كتير مهمة في الحياة غير الارتباط بشخص ما، وضحتها الإعلامية رضوى الشربيني في برنامجها “هي وبس” على شاشة “سي بي سي سفرة” مؤكدة أن العلاقات العاطفية ماهي إلا نافذة واحدة ضمن نوافذ عديدة في الحياة.
حياة اجتماعية قوية
طول ما أنتِ مش مرتبطة هتلاقي فرصة توسعي دوائر معارفك وأصدقائك، لكن وأنتِ بتعملي دا، خدي بالك يكون فيها ناس من نفس حالتك الاجتماعية، لما تحبي تخرجي تلاقيهم متاحين مش وراهم بيت وعيال.
الوقت المطرقع
كل فترة اعملي حاجة برة الصندوق، سواء سفر أو تجربة مجنونة وجديدة عليكي. استغلي أنك مش ملتزمة بمسؤوليات مضطرة تقيدك في مكان واحد طول الوقت، وعيشي تجارب مختلفة ومطرقعة.
نظرية نصف الكوب
متبصيش بس للنص المليان من الكوب، شوفي الجزئيين، العيوب والمميزات، مش كل المتزوجين مبسوطين في حياتهم، وخلي عندك يقين أن حالتك الاجتماعية اللي أنتِ فيها لوحدك، أفضل ما تكوني متزوجة ومش مبسوطة، طبقي النظرية وهتلاقي عندك إشباع داخلي بالراحة.
سدي ودانك عن كلام الناس
الناس مش هتبطل كلام، ودايمًا هيحسسوكي أنك مش هتقدري تكملي لوحدك وإن وجود راجل في حياتك هو دا بس المعنى الوحيد للسند. سدي ودانك عن كلام الناس وكوني أنتي سند وضهر نفسك وشايلة نفسك.
متخافيش من الوحدة
الخوف من الوحدة هيخليكي تدخلي في علاقات مؤذية بدون ما تكوني مدركة عشان خايفة تكبري لوحدك، لكن فكري تستغلي أنك مش مرتبطة بتركيز وقتك كله في تطوير نفسك دايمًا بعيد عن أنك تنتظري راجل في حياتك.
قيمي نفسك
اعرفي أنك تستاهلي الأفضل وإن قيمتك كبيرة، مش معنى أنك مش مرتبطة، أنك متاحة لأي حد، خدي وقتك واختاري الرجل اللي يناسبك ومتسمحيش لحد يتجاوز حدوده معاكِ لمجرد أنك سينجل.
حوشي فلوسك
أمني مستقبلك وحوشي فلوس، مش مرتبك كله تصرفيه، شيلي جزء منه وأنبسطي بجزء واتعلمي بجزء وطوري من نفسك وخبراتك في مجالك.
