حل الشاعر فارس قطرية ضيفًا على برنامج “هي وبس”، الذي يعرض على قناة “سي بي سي سفرة” لمقدمته الإعلامية رضوى الشربيني، وألقى خلاله عددًا من أحدث قصائده، وضمنها قصيدة “ما يمكن خير”.
وإليكم قصيدة “ما يمكن خير” للشاعر فارس قطرية مكتوبة:
قصيدة ما يمكن خير
ما يمكن خير ما يمكن كل أحزانك هتتبدل وتصبح غير
تضيق وضيق وتستحكم عشان تفرج بأمر الله
وربك عالم النية وعالم بالسلوك والسير
تعبت كتير وإيه يعني وهي الدنيا إيه غير هم
ولو كان اللي فات تجريح أكيد الجاي سعادة يا عم
بلاش تزعل على اللي رماك وركز في اللي لسه معاك
يغوروا في ألف داهية هناك بلا اشتغالات وحرقة دم
شبعنا مسايسة ومحايلة وطبطبنا وماعجبناش
وياما ادينا بايدينا وبعنينا وما أخدناش
وإيه كان يغصب الواحد على الهم اللي كان شايله
هنفضل في المقام غالين ولو مع مين ما يشغلناش
هتطرح تاني وتخضر ونلقى الفرحة ترضينا
عشان النية خير لله مافيش مكروه هيحنينا
وسبحانك يارب الناس يا واقف جنب كل الناس
وعالم باللي في قلوبنا وعارفنا نضاف فتحمينا
لقلب فيه أحزان وأهلكه الأسى صبرا
سيأتي كل ما تبغى وتلقى فرحة كبرى
خلقنا في الأسى نمشي ولكن لم نمل يوماً
قريبا سوف نرتاح ويصبح كسرنا جبرا
لعين أهلكت دمعاً وكان القهر يضنيها
سيصبح دمعها ذكرى وعوض الله يرضيها
وإن كانت بكت يوماً على الحزن الذي فات
سيأتي عليها أيام وجبر الله يبكيها
مافيش حاجة أنت بتسبها ولك فيها نصيب باقي
ولو سابك عزيز على القلب تأكد إنه مش باقي
لزعلك على اللي فات منك يرجع لك حاجات راحت ولا هتموت إذا غابوا
وأديك يا أصيل تعبت كتير وأديهم شبعوا قاموا سابوا
وعادي الدنيا بتكمل وفيها كتير فشوف حالك
هتتعب تاني وتعاني ولسه الدنيا شايلة لك
فخلي يقينك الدايم في رحمة ربك الدايم
وزي ما شفت حزن كتير هتلقى الفرحة جيالك
بقالك مدة مش مظبوط ومضايق
وكنت يا واد ما تشغلهاش لو الدنيا تبوظ
رايق وبالك عمره ما اتعكر ولا تفكر ولا بتحسب
في مين قال إيه ومين عمل إيه ومين نايم ومين فايق
زيادة نعمة الإحساس يخليك تتهلك بدري
بتتأثر بأي كلام وتزعل بس مع حالك
وعلشان ما تعاتبش كتير فتطلع في العيون شكاي
بتعمل شاي وتبقى وحيد عشان الوحدة أحلى لك
وكنت زمان في أي مكان بتخلق بهجة وسعادة
ودلوقتي انت شخص كئيب مين الهم ده جالك
وليه زعلان وليه تعبان يا عم يغوروا بعيوبهم
يغوروا بكل ما فيهم وبالقسوة إللي في قلوبهم
ولا يهزك كلام متقال ومهما اتقال فبرضوا كلام
تخليك انت بأصولك وهم يغوروا بذنوبهم
مش لايقة عليك الهم وعمرك لسه في الأول
وان شاء الله الزعل هيزول وتبدأ تاني من الأول
ولو كان اللي فات تجريح وكله هموم ومش عاجبك
فكل الجاي بأمر الله جميل والفرح هيطول
وعجبي..
