كلمات بسيطة وعبارات امتنان أجابت بها الإعلامية رضوى الشربيني عن سؤال متكرر لمشاهدات برنامج “هي وبس”، وهو ” إزاي أحافط على الراجل إللي باحبه؟”.
الموضوع كله بيتمحور حوالين إنك تكوني واضحة وصريحة وفي نفس الوقت حقيقية في التعبير عن مشاعرك للراجل إللي بتحبيه.
لو عايزة طريقة معينة ابدئي بيها
مش دايمًا الرجالة بتفهم أنتي عايزة إيه، ودا مش عيب فيهم، لكن تكوينهم كدا. لو عايزة الراجل يعاملك بطريقة معينة، ابدأي أنتِ بيها، مثلًا نفسك تتعشوا برة؟ اقترحي عليه تخرجوا، عايزاه يحكي لك عن يومه؟ ابدئي أنتِ اسأليه عن يومه إذا كان تمام أو لأ وبعدين ابدئي أنتي كمان احكي له يومك.
امدحي فيه
الرجالة كمان بتحب تسمع كلام حلو، لكن فرق بسيط بين المدح والنفاق، كوني حقيقية ومش مفتعلة في المدح، عبري بس عن المميزات إللي أنتي فيها بتحبيها فيه وشدتك له.
الرسايل الواضحة
بلاش “ما أنت لو مهتم كنت عرفت لوحدك” هما مش بيفهموا الرسايل الغير واضحة، زعلانة، روحي قولي له أنتي زعلانة من إيه لكن بذوق مش بخناق والفتي انباهه إنك بتقولي له عن اللي مضايقك لإنك مهتمة علاقتكم تكمل.
اديله مساحته
أي إنسان يحب يكون له مساحته من الخصوصية، سيبي له وقت يعمل اللاشئ وبلاش تكوني متطفلة وعايزة تعرفي كل شوية هو غايب فين وبيعمل إيه.
متعمليش من الحبة قٌبة
خليكي بسيطة في زعلك وبلاش خصام الأسابيع والشهور اللي بيتحوّل لمشكلة كبيرة ويخلي فيه بينكم فتور، وبلاش مع كل زعل تقولي له إحنا لازم نسيب بعض، خليكي عزيزة في زعلك.
محدش كبير على الدلع
وبالذات الراجل مهما كبير، هيحب يفضل يحس إنه مُدلل لكن متأفورين في الدلع عشان ميبقاش ماسخ.
